ភ្នំពេញ៖ វ៉ាក់សាំង Pfizer ដែលជាជំនួយរបស់សហរដ្ឋអាមេរិក ក្រោមយន្តការ COVAX ត្រូវបានដឹកមកដល់កម្ពុជាកាលពីព្រឹកថ្ងៃទី៣ ខែឧសភានេះ។

អង្គការ UNICEF ប្រចាំកម្ពុជាបានថ្លែងអំណរគុណដល់ស្ថានទូតអាមេរិកប្រចាំកម្ពុជា និងភ្នាក់ងារជំនួយអាមេរិក USAID ដែលបានផ្ដល់វ៉ាក់សាំងដល់កម្ពុជានៅថ្ងៃនេះ។

ស្ថានទូតអាមេរិកប្រចាំកម្ពុជាបានសរសេរនៅលើហ្វេសបុករបស់ខ្លួនថា៖ «ការបញ្ជូនមកនៃវ៉ាក់សាំងកូវីដ Pfizer ចំនួន ២លានដូស តាមរយៈគំនិតផ្តួចផ្តើមនៃយន្តការ COVAX សហរដ្ឋអាមេរិកបញ្ជាក់ជាថ្មី នូវការប្តេជ្ញាចិត្តយូរអង្វែងរបស់យើង ចំពោះសុខភាព និងសុខមាលភាពនៃប្រជាជនកម្ពុជា។ កាលណាយើងធ្វើការជាមួយគ្នា យើងអាចយកឈ្នះជំងឺកូវីដ-១៩»។

កាលពីព្រឹកមិញនាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងដោយដាក់បញ្ចូលសិស្សនិសិ្សតទាំងអស់នៅកម្ពុជាជាក្រុមអាទិភាពនៃយុទ្ធនាការចាក់វ៉ាក់សាំងកូវីដ-១៩ និងអនុញ្ញាតឱ្យប្រើប្រាស់វ៉ាក់សាំងដែលទទួលបានមកនេះចាក់ជូនសិស្សនិស្សិតទាំងអស់ផងដែរ៕